Golden Milk

Har du influensa, er litt småpjusk eller berre har lyst på noko skikkeleg godt å varme deg på, er golden milk noko du må prøve! Golden milk har sitt opphav i India, og er kort og godt kryddermjølk. Det skal visst nok ha fleire helsebringande effektar, men om dette stemmer veit eg ikkje. Eg drikk det likevel gjerne, då det smakar utruleg godt og er eit fint alternativ til te, kakao og kaffi.

Golden milk (2 koppar)

1 ts kokosolje

1 klype pepar

1 ts gurkemeie

1-2 ss finreven ingefær

0,5 ts kanel

1 ss honning

4-5 dl mjølk / mandelmjølk / soyamjølk / havremjølk

Smelt kokosolja i ein kjele på svak varme. Køyr dei andre ingrediensene i ein blender eller med stavmiksar. Hell heile mjølkeblandinga over i kjelen med kokosolje. Varm opp til det byrjar å ryke, medan du rører rundt. Sil mjølka over i to koppar og nyt!

–

Eg har ein influensa som eg ikkje blir heilt kvitt og slit litt med å finne roen når det er vinterferie og det er så mange ting eg burde ha gjort. Men no har eg funne fram Olaug Nilssen si siste bok og skal sette meg ned med den. Eg har høyrt mykje godt om den, men også at den er tøff lesnad. Har nokre av dykk lest den?

Ha ein fin onsdag alle saman!

/Inga

 

Ingefærshot

Framover skal eg forsøke å skrive litt meir om restemat, -for det er både økonomisk, smart og bra for miljøet!

I forbindelse med vekeshandelen som me tek på onsdagar eller torsdagar, pleier me å endevende kjøleskapet dei to dagane før. Då skal siste rest brukast opp. Det viktigaste er ikkje at me har fancy middagar desse dagane, -men at folk blir mette og kjøleskapet tømt for eventuelt som nærmar seg best før-dato. Det har resultert i ein del rare og kreative middagar.

No i helga fekk eg brukt opp to sitroner som hadde byrja å tørke ut på benken. Eg hugsar ikkje heilt kva som var planen med dei, og har rett og slett gløymt dei heilt ut. Då eg også hadde ingefær og eit einsleg, rynkete eple i grønsaksskuffa, laga eg ingefærshot! Det er kjempe sunt, godt og gir eit skikkeleg kick på morgonkvisten.

Til 2 shots treng du:

1 sitron

1 eple

20 g ingefær

Skrell sitron og eple. Skrell og finhakk ingefæren. Køyr alt i ei juicemaskin til du har skvist ut den safta du kan. Server i to små glas.

Om du ikkje har juicemaskin, kan du fint bruke sitron og ingefær i smoothie, eller aller best, i heksebrygg! Det er kokande vatn tilsett sitronsaft, grovhakka ingefær, chili og litt honning. Det er sterkt, godt og tek knekken på forkjølelsen.

Ha ein fin morsdag og fastelavnsøndag alle saman!

/Inga

 

Bondens kasse

I samarbeid med Bondens kasse

Det er stas med alle småprodusentar rundtom som lagar mat og drikkevarer som me andre kan nyte av. Dei seinaste åra har det vore ei merkbart større satsing på lokalprodusert mat. Samstundes er det ofte ei utfordring å få oversikt over kva som finst og kor ein kan få tak i produkta.

Dette har folka bak Bondens kasse eit ynskje om å gjere noko med! Bondens kasse er ein matkasse som blir levert ein gong i månaden. Kassen inneheld lokalproduserte varer frå bønder og småprodusentar i din region.

Kassen inneheld kjøt/fisk til 2 middagar for 4 personar i tillegg til frukt, grønt, ost, pålegg, syltetøy, drikkevarer og anna godt. I tillegg får ein eit hefte med oppskrifter tilpassa innhaldet av kokebokforfattar Margit Vea og ein presentasjon av dei ulike bøndene og småprodusentane. Dette er ikkje ein middagskasse som tek sikte på å løyse tidsklemma, men snarare ein kasse som ynskjer å synleggjere lokalproduserte varer frå din region. Det er fint det!

Eg har abonnert på Bondens kasse ei stund og er særs nøgd. Det er beint fram stas å få levert smaksopplevingar frå småprodusentar her på Haugalandet, Ryfylke og andre stader i Rogaland rett på døra. Eg ante ikkje at det var så mange (og varierte) produsentar heromkring, og det er veldig kjekt å kunne støtte dei gjennom å abonnere på kassen.

Under ser de april-kassa mi som innehaldt utruleg mykje fint!

Per i dag blir Bondens kasse distribuert i fleire kommunar i Rogaland og i Asker og Bærum. Sidan lanseringa i november i fjor, har den vore i sterk vekst og dekker stadig nye kommunar.

// I samarbeid med Bondens kasse får eg dele ut ein rabattkode på 25% rabatt på første matkasse! Ein oppgir rabattkoden «notisboka» når ein legg inn bestillinga og rabattkoden varer til og med 1. juni. Stas!

Eg har fått tilbakemelding om at det er litt teknisk krøll med rabattkoden, men ein held på å ordne problemet. 🙂

Vitaminer mot haustbasseluskar

Skarlagensfeber, munn- og handsjuke, luftvegsvirus med meir. Har ein barnehageborn, blir ein introdusert for mykje rart av basseluskar. Kven har til dømes høyrt om munn- og handsjuke før? Ihvertfall ikkje eg. Det næraste eg kom var kugalskap…! Det var det heldigvis ikkje.

Eg krysser fingrar og tær for at basseluskane held seg på ei armlengdes avstand framover. I mens køyrer eg på med alt eg trur kan halde kroppen frisk og rask. Som til dømes denne vitamininnsprøytinga av ein smoothie. -Og om den ikkje skulle funke for kroppen, smakar den uansett veldig godt!

Ingredienser

• 1 godt moden pære
• to handfuller spinat
• 1 «tommel» fersk, finhakka ingefær
• 1 dl eplejuice
• litt sitronsaft / limesaft
• 2-3 isbetar
• 1 ss chiafrø

Køyr alt saman i blender til du har ein jamn smoothie. Evt. ha chiafrøa i til slutt og rør rundt.

Ha ein strålande og basseluskfri kveld!

/Inga

Sjokolademilkshake for gravide og andre trengande

Det har vore få spanande cravings å skrive heim om denne graviditeten også. Eg har ikkje kjent noko sug etter verken murpuss, eksos eller kokosbollar. Heilt til no.

Eg er blitt ekstremt oppteken av sjokolademilkshake dei siste vekene. Eg har lyst på det kvar.dag. Det geniale med graviditet er at ein då kan forklare det med at «då er det nok eit signal frå kroppen om at den treng det». Eg er ihvertfall ein ivrig tilhengar av den teorien og slik vert det fort smågodt-tysdagar og sushi-torsdagar. Kroppen befaler!

Men. Ein kan kanskje ikkje meske seg med milkshake kvar dag. Eg har difor laga ein litt meir nyttig versjon dei siste vekene som har blitt ein schläger både hjå meg og minstemann. Den vert nytta som dessert, mellommåltid eller blodsukkerredning når ein kjem frå barnehagen og det er lenge til middag. Den inneheld ikkje sukker eller iskrem, men smakar likevel overraskande usunt og herleg kremete.

«Godt!!!» utbraut O entusiastisk fleire gonger i dag då han fekk det etter barnehagen, -og tru meg, det er eit betre smaksbevis enn fem stjerner frå Robinson og Fredag.

Ein litt meir nyttig sjokolademilkshake
(2 store glas)

• 3 dl H-mjølk
• 1 banan (gjerne økologisk)
• 1-2 ss kakaopulver
• 1/2 ts ekte vaniljepulver
• 4-5 isbetar

Køyr alt i blender til du har ein krema og fin konsistens. Server i glas og gjerne med eit fint sugerøyr!

(Om du har i ein espresso vert det ein genial iskaffi som like gjerne kan drikkast på morgonkvisten som etter middag.)

Kos deg!

/Inga