Kvit Astrakan

Eit av prosjekta i helga var å lage eplemos av dei første epla frå Etne. Me har fleire eplesorter der inne, men mesteparten av epla kjem frå gamle epletre som oldemor mi planta. Om eg ikkje tek feil, heiter sorten på to av trea Hvit Astrakan. Dei er tidleg modne, er saftige og gode, men med kort haldbarheit.

Eg har prøvd å lage juice på dei, men ferskpressa får dei ein litt emmen ettersmak. I staden er epla nydelege i eplekake, eller i det me et aller mest av; eplemos! Det er godt til youghurt og müsli, men oftast bruker eg det som tilskot i smoothie i staden for kjøpe-eplejuice. Eg har difor ikkje i sukker, men om du ynskjer å lage ein søtare mos til bruk som syltetøy, kan det vere godt med litt ekstra søtning. Oppskrifta eg bruker finn du her.

I sesong i november

Om me vil handle litt ekstra bærekraftig, følger me sesongen og kjøper norsk. Norsk frukt og grønsaker er kortreiste, og det som er i sesong, har ført til lågare Co2-utslepp enn det som vert dyrka i store oppvarma drivhus. At grønsakene er i sesong, betyr ikkje nødvendigvis at dei vart plukka opp av jorda i går. Då til dømes rotgrønsakene er så lagringsdyktige, er dei like fine og næringsrike som då dei vart hausta. Dette fører til at sjølv om me er i november, er det mykje deilig å ete!

Norsk i november

Grønsaker: kinakål, grønkål, hovudkål, raudkål, kålrot, stangselleri, purre, blomkål, rosenkål, gulrot, sellerirot, pastinakk, pepperrot, jordskokk, raudlauk, gul lauk, sjalottlauk, poteter og neper.

Frukt: eple

Import i sesong

Elles er det ein heil del som ikkje kan dyrkast i Noreg, men som likevel smakar best (og er mest miljøvenleg) i sesong. Eg har difor tatt med den frukten som berre vert importert, og som er i sesong akkurat no. Det er appelsiner, grapefrukt, klementiner, sitron og kiwi.

Dette er med andre ord tida for å komme i julestemning med klementiner, dra på årets første skitur med appelsin, lage middagar med ovnsbakte grønsaker eller å servere stangselleri og gulrot med ein deilig dip. Moglegheitene er uendelege!

Ha ein fin kveld!

Inga 🙂

LagreLagre

Gjenbrukspurre

Etter å ha lest denne saka om kor enkelt det er å dyrke sin eigen vårlauk på restar av gamle, måtte eg prøve med ein purre me hadde til middag i forrige veke. Det verka! Den har allereie byrje å spire og gro. Etter middagen i dag, vart fire vårlaukar sett i vatn i håp om å dyrke fram dei også.

Har du nokre erfaringar med å dyrke fram nye grønsaker frå matrestar?

Inga 😀

Forsøk på å handle emballasjefritt: forsøk 1

På måndag starta det. Mitt nye forsøk på å produsere mindre avfall. Mannen var skeptisk og såg nok for seg at me kom til å leve på kålrot og springvatn, -evt. at matbudsjettet kom til å bli firedobla ved at me måtte byrje å handle alt i spesialbutikkar.

Eit kompromiss vart at me byrja i det små og tok ein vanleg vekeshandel i den faste butikken, men skulle velje emballasjefritt der det var mogleg.

Handlelista innehaldt heilt ordinære ting for ein småbarnsfamilie. Ost, mjølk, havregryn, frukt og grønt, pasta med meir.

Handelen gjekk dårlegare enn venta. Til tross for at dette var ein velassortert matbutikk, vart berre 10 av 42 artiklar emballasjefri.

Emballasjefri produkt: appelsiner, dadler, eple, sitron, mango, kålrot, ingefær, purre, søtpotet og kaffibønner.

Alternativ til emballasje og plastposar: små vaskenett til frukt og grønt, papirpose til kaffibønner og handlenett til alle varene. Alt tok eg med heimefrå.

Det var i hovudsak frukt og grønt som gjekk av med sigeren, men også her var det alt for lite å få i lausvekt. Kvifor må ein til dømes pakke inn ein blomkål i plast? Eller ein agurk? Det er ei gåte for meg.

Då ein heller ikkje kunne få kaffi i lausvekt, slik eg hadde trudd på førehand, vart redningen å stikke innom kaffibaren til Amundsen på veg heim. Der fekk eg kjøpe deilige kaffibønner i lausvekt, og fekk dei med meg i ein tom papirpose eg hadde med heimefrå. Eg skal innrømme det var først litt rart å spørje om eg kunne få kaffien i medbragt pose. Då den strålande jenta bak disken viste seg å vere nysjerrig på prosjektet, vart det i staden berre hyggeleg! Kaffien var også heilt nydeleg, så så langt har det emballasjefrie prosjektet til og med vore litt luksus!

Då eg er i Tyskland heile neste veke, tek prosjektet ein liten pause før eg prøver igjen veka etter. Då skal kvitteringa innehalde fleire emballasjefri produkt!

/Inga

Restejuice

Etter gårsdagen og den første frukosten (her i huset blir det tid til både ein, to og tre frukostar før alle er klare for dagen i helgene), låg det inntørka eplebåtar og halve appelsiner over alt. Slikt som nokre små personar ein gong hadde lyst på, -men som dei ikkje åt opp likevel. Det har ein tendens til å hope seg opp slike rester.

I dag gjekk alt i frukostjuicen til (den tredje) frukosten. Saman med nokre betar ingefær, nokre ekstra eple, appelsiner, -og nokre triste gulrøter nederst i grønsaksskuffa, vart det ein fin start på dagen. Juicemaskina er reine «bli ny-maskina» for frukt og grønt.

Denne ryddige illustrasjonen av frukostbordet er forresten lite representativ for korleis det eigentleg ser ut. Flytter eg meg 20 cm bort, ser det heile meir realistisk ut: