Om grøn kvardag og andre fine saker
I kveld gjestar Dag Jørund Lønning, forfattar av den kritikarroste boka Jordboka, høgskulen. Han skal i samtale med Margit Vea snakke om jord og kvifor den er så viktig for matproduksjon, økologi og helsa vår.
Eg har lest mykje om boka hans og den står høgt på leselista. Jorda og korleis me tek vare på den, er viktigare enn me trur.
Om du kan, -ta turen til høgskulen i kveld og bli litt klokare på det som er under beina våre!
Som eit alternativ til Black Friday, arrangerer DNT Ung Haugesund Grønn fredag her i Haugesund om ei veke. Her kan du byte til deg brukte friluftsklede- og utstyr, eller å selje til andre. Er ikkje det flott? Eg blir utruleg glad når det poppar opp slike fine initiativ rundt oss! Meir informasjon om Grønn fredag i Haugesund, finn de her.
I fjor arrangerte eg Green Sunday i nabolaget. Me plukka søppel i nærområdet og avslutta med pinnebrødgrilling, bålpanne og god stemning ute. Det var veldig kjekt, -og me fekk fjerna urovekkande mykje søppel før vinteren kom for fullt.
I oktober og november kjem rettebunkene på rekke og rad, så alt anna hamnar litt på sidelinja. Eg gler meg til å skrive meir her inne no etterkvart, då eg har mykje på hjarta.
Eg ynskjer dykk ein flott fredag!
Inga
Laurdag gjekk fiksedagen av stabelen, og eg var innom og kika. Det var eit veldig fint arrangement! Haugesund husflidslag, Spinn sykkelbutikk med fleire, var der for å reparere saker og ting folk kom med. I tillegg hadde Framtiden i våre hender og Besteforeldrenes klimaaksjon stand der dei delte ut informasjonsmateriell og var klare for å slå av ein prat.
Eg hadde ein veldig kjekk prat med Ståle Pedersen frå Besteforeldrenes klimaaksjon. Han hadde eit stort engasjement for klimasaka, og vil gjerne ha fleire medlemmer her på Haugalandet. Om du er interessert, kan du melde deg inn her.
Han fortalte mellom anna at han har heilt slutta å fly, som eit bidrag til klimaet. Det er imponerande!
Fremtiden i våre hender var også på plass med kjekke folk og mykje nyttig informasjon. Eg fekk med meg eit av dei fine blada deira, med mange gode tips til ein grønare kvardag.
Sjølv hadde eg ingenting som skulle fiksast denne dagen, men eg håpar dette arrangementet vert til neste år også. Eit flott tiltak fleire må besøke!
Kunne du tenkje deg å vere med på eit pilotprosjekt for solcelleenergi på Haugalandet? Haugaland Kraft er no på utkik etter kundar som kan tenkje seg å teste ut solcellepanel før dei vert tilbydd til alle. Leverandør av solcellepanela er Norske Soltak. Nærare informasjon og skjema for å melde si interesse, finn ein på nettsidene deira her.
Det er nærliggande å tenkje at gråvêret på Vestlandet gjer det vanskeleg å hauste solenergi, men John Harald Jakobsen, direktør for Haugaland Kraft Energi, uttalar dette til Haugesunds avis:
Rogaland har like gode meteorologiske forutsetninger for solenergi som Danmark og Nord-Tyskland, så det er ikke solen eller skyene dette står på.
Interessant! Dette blir eit spanande prosjekt å fylgje med på.
Hugs at det er Fiksedagen på Gamle slaktehuset i dag. Ta med deg noko du skulle ha reparert eller gå utan og få mange andre gode tips!
Ha ein flott laurdag til alle og ein kvar, -også til dykk som ikkje bur i Haugesund!
Inga 🙂
På laurdag er det Fiksedagen på Haugalandet! Arrangementet er på Gamle slaktehuset og varer frå kl. 11.00-15.00.
Her kan ein komme for å få reparert alt i frå sko til syklar, og å få tips og inspirasjon til korleis ein kan fikse og redesigne eigne ting heime. Mellom slaga kan ein nyte kaffi (av den beste i byen) på cafeen Hos Carlos som ligg i same bygget. Her er det altså mange gode grunnar til å ta turen!
Det vert arrangert ulike fiksedagar med jamne mellomrom over heile landet. Om du ikkje finn ein der du er, kan du finne mange tips og lenker til handverkarar på Naturvernforbundet si nettside Ta vare på det du har. Å ta vare på det du har ved å reparere eller redesigne, sparer kloden for mykje avfall og store utslepp. I tillegg sparer du lommeboka!
Her er nokre gode fiksarar i Haugesund, som eg har skreve om tidlegare:
Ha ein flott dag!
Inga 🙂
Notisboka 