I-siste-liten-gåver

Om du, som meg, kvart år er ute i siste liten når det kjem til gåver og juleførebuingar, er her nokre grøne tips til siste-liten-gåver!

Gi noko som folk kan gle seg over til julefrukostane, julebrunchen eller over nyttår. Kjøp ei flaske med ekstra god eplejuice på ein velassortert matbutikk eller Vinmonopolet, nokre gode ostar eller anna godt som du veit blir oppete i jula. Du kan fint lage nokre smakfulle gåver i siste liten også. Kva med ein nydeleg tomatpesto som kan etast både med brødmat og til lutefisken? Eller kva med nokre snickerskuler laga av berre tre ingredienser? Sjå oppskrifter nedanføre. Elles er grøne gåvekort den beste, mest miljøvenlege og ikkje minst mest kjærkomne gåva å både gi og få når ein er ute i siste liten. Ja til fleire grøne gåvekort under juletreet!

Den enklaste tomatpestoen i verda

1 gl. hakka, soltørka tomater av merket Paradiso*

Hell heile innhaldet i ein behaldar som passar til ein stavmiksar, og mos i veg. Når du har ein purèliknande konsistens er du ferdig. Hell over på eit glas, -eller enda betre; vask og skrubb av etiketten på det glaset som tomatene kom i! Det har eit fint gullok og då bruker du alt. Her vert det zero waste og du har ei smakfull gåve på 1-2-3.

*Eg har prøvd andre merke, man mange vert for salte. Denne er akkurat passe på smak, og inneheld også kapers, kvitlauk og krydder. Du finn den i dei fleste daglegvarebutikkar.

Veganske snickerskuler

1 del peanøtter

1 del dadler

kakaopulver til å rulle i

Køyr ein del dadler og ein del peanøtter i foodprocessor til du har ein deigete konsistens. Smak gjerne til, slik at du får dei så salte/søte som du ynskjer. Rull emne til passe store kuler, og vend i kakaopulver. Då får kulene ein fin bitter sjokoladesmak, som passar til det søte. Putt i ein fin boks eller på eit glas, og gi bort som søt gåve til jul! Om du ikkje ender opp med å ete dei sjølv, som eg av og til har gjort…

Grønt gåvekort

Den beste idèen er alltid å gi eit grønt gåvekort til nokon! Framtiden i våre hender har laga eit eige som ein kan printe ut frå nett. Her finn du mange gode tips til grøne gåver. Kva med barnevakt, selskap under joggetur, piknik, sykurs, hagestell eller den beste; 1 time lytting utan avbryting? Hehe! Har du ikkje printer tilgjengeleg, kan du fint lage eit handskrive eit. Tid og sosialt samvær med vener og familie er det dei fleste av oss ynskjer oss mest. Ei betre gåve skal du leite lenge etter.

 

Ynskjer dykk alle ein fin kvelden-før-kvelden, -og sjekk gjerne Instastoryen min. Der lagar eg tomatpestoen!

Inga 😀

LagreLagre

Gi noko brukt til jul

Finn.no har i desse dagar ein kampanje der dei oppfordrar folk til å gi meir brukt til jul. I ei brukarundersøking gjort av dei, seier 7 av 10 at dei vegrer seg for å gi  ei brukt gåve til jul. Det er synd, for brukt er jo ofte like bra som nytt og det er ikkje «mindre fint» å gi bort noko som er brukt.

Heia Finn.no som set fokus på dette! Gå gjerne inn og lik bileta deira på Facebook, for å spre bodskapen om du er enig.

 

Ha ein flott kveld! 

Følg Notisboka på Instagram og Facebook for å få nye innlegg rett i nyhendestraumen. 

Ei god nok jul

Denne bloggen tok ein skikkeleg juleferie i år, -men no er den tilbake og klar for 2017! 2016 vart eit mørkt år på mange måtar og det er godt å starte på eit nytt.

Me feira julafta for fyrste gong heime, og det var veldig spanande og stas. Me kom ikkje i mål med alt. Huset var på ingen måte rundvaska, julebaksten vart i år ein porsjon steinharde biscotti og innkjøpt konfekt,-og eg gjekk i kyrkja på julafta med ein kjole som viste seg å ha gulpeflekker frå i fjor. Men. Me var enige om at det var heilt innafor og godt nok! Lutefisken på litlejulafta og pinnekjøtet på julafta vart vellukka, og store og små hadde det uendeleg koseleg i lag. Då gjer det ingenting om nokre hybelkaniner dansar vals under sofaen.

Ovanfor ser de nokre favorittar på kjøkenbenken akkurat no. Eit lite avokadotre som har grodd fram frå ein avokadostein og nokre av dei fine stettefata svigerfar min har dreid sjølv. Dei er så vakre, og står framme til ei kvar tid.

Håpar de også hadde ei «god nok-jul» og eg gler meg til å snakkast vidare i 2017!

Grøne julegåver under juletreet

1 / 2 / 3 / 4 / 5 / 6 / 7 / 8 / 9 / 10 / 11

Har du lyst til å gi grøne julegåver under treet, kjem her fleire tips. Dette er julegåvene du bruker opp, som reparerer det du allereie har, eller som ein kan gjere gode kjøp på i bruktbutikkar!

For dykk som bur på Haugalandet har eg lagt inn tips til kor ein kan få tak i nokre av sakene.

1. Messinglysestakar. Det er ingenting som er så fint som desse i førjulstida. Dei er eigentleg like stemningsfulle uansett kva årstid ein er i. Bruktbutikkane bugnar over med rimelege messinglysestakar om dagen, -så kvifor ikkje kjøpe nokre til nokon du er glad i?
2. Donasjonskort frå Sabima. Gi naturen ei julegåve!
3. Gåvekort på reparasjon av mobiltelefon, nettbrett, pc eller liknande. Dette er den perfekte gåva for slike som meg. Hadde det vore eit Norsk Slepphendtforbund, hadde eg vore heidersmedlem. Eg mister mobilen min ofte i golvet, og har knust skjermen mange gonger. Det er den mest keisame utgifta eg veit om. Å få gåvekort på ein slik reparasjon eller anna service på tekniske duppedittar, -er gull! EasyFiks tilbyr gåvekort for dei som vil gi ei nyttig gåve til jul.
4. Stearinlys. Me er inne i mørketida og det å tenne lys blir like vanleg som å pusse tennene. Om du bur på Haugalandet, må eg anbefale Litledalen lys i Etne. Dei dypper eigne kunstferdige lys med både ein, tre, fire, åtte og tretten(!) armar. Lysa deira er noko av det vakraste eg veit om.
5. Gåvekort på kino, teater, konsert eller ei anna oppleving. Tid i lag og opplevingar saman er noko dei fleste treng meir av. Hjå Edda kino og Festiviteten finn ein slike gåvekort.
6. Bondens julekasse. Gi ein kasse med lokalprodusert mat frå Haugalandet!
7. Juleroser. Julemagasinet med tekstar frå norske forfattarar, med Herborg Kråkevik i redaktørstolen. Stemningsfullt og rein sakthygge (om det er eit ord).
8. Jerngryte. Er det ein ting eg bruker mykje, så er det jerngryta mi. Eg bakar brød i den, lagar pasta, supper og koker kraft. Den er nesten dagleg i bruk. Jerngryter kan ein fint gjere kupp på i brukthandlar.
9. Te. Denne økologiske teen frå Anassa Organics får ein kjøpt på Ølen Møbel.
10. Gåvekort på klipp eller andre behandlingar. Kvifor ikkje gå for gåvekort hjå ein grøn frisørsalong? Her på Haugalandet kan PUR Grønn anbefalast.
11. Kaffi. Noko mange ikkje kan leve utan, inkludert meg sjølv. Ein pakke bønner eller malt Amundsen spesialkaffi, blir alle glade for!

Her finn du ei liste over fine bruktbutikkar på Haugalandet.

Ha ein fin kveld!

Lenkene er ikkje eit resultat av sponsa samarbeid. Berre frivillig heiing på lokale krefter. 😀

Bevar norsk natur- og dyreliv til jul

Visste du at myr er naturtypen på jorda som lagrar mest karbon? Visste du at gamalskogen i Noreg er bustad for truga artar som lavskrika, bredøren og huldrestry? Visste du at biene våre er ein viktig del av matsikkerheten?

Alt dette er truga. Vegutbygging, hyttefelt og ikkje minst uthenting av torv som ein sel i hagesentera, er med på å fjerne norske myrar litt etter litt. Dette er dårleg nytt for klima.

Gamalskogen er truga grunna flatehogst. Dei siste 60 åra har me flatehogd tre fjerdedeler av norsk skog, om omvandla den til skogsplantasjar. Dette trugar det biologiske mangfaldet.

I dag er ein tredel av villbiene i landet utrydningstruga. Grunnen er forvitring av kulturlandskapet. Gjengroing og eit intensiviert landbruk, fører til mindre slått og beite i naturen. Dette reduserer matfatet til biene. Biene er avgjerande for pollineringa i naturen, og om dei er truga, vert  automatisk matsikkerheten vår truga.

Heldigvis er det ein organisasjon som kjempar for desse sakene.

Sabima er ein norsk paraplyorganisasjon som jobbar for å bevare naturmangfaldet i Noreg. Organisasjonen representerer alle biologiske foreningar i Noreg.

Det er lett å tenke på regnskogen når ein skal tenkje på naturvern og klima. Likevel er norsk natur like viktig å bevare! Karbonlagring i skog og myrar og eit biologisk mangfald av dyr, fuglar og planteartar er med på å gjere jorda robust og ikkje minst redusere klimatiske endringar. Både i verda og her lokalt.

Dette er uendeleg viktig for dei neste generasjonane. Og det er no me må gjere noko.

Du kan støtte Sabima sitt arbeid ved å donere eit eingongsbeløp eller eit beløp i månaden. I tillegg har dei mange fine produkt ein kan kjøpe i gåve til seg sjølv eller andre!

Saman med alle kort, kjem eit origamiark!

Kva med eit donasjonskort som støtter trygging av heimen til dei utrydningstruga artene? Eller eit handlenett med fine bier? I nettbutikken deira finn ein mange gode julegåver.

Dette er ikkje berre julegåver til folk du set pris på, men også ei julegåve som reddar naturen. Det er fint det!

Sabima står på godkjentlista til Innsamlingskontrollen. Det kan de lese meir om her.