Søtt møter salt i salatbolla

Eg er frykteleg glad i søtt møter salt. Smash og Walters mandler har som oftast ei uhyre kort levetid i kjøkenskapa våre.

Men. Søtt møter salt er ikkje berre godt i sjokoladevegen! Dette kan ein prøve i så mangt. Ein god søt-salt kombo er til dømes denne salaten med appelsin og Haukeli-chevre.

Det er appelsintid i butikkane og når ein krysser sur-søte appelsiner med salt og frisk chevre, kan det ikkje bli anna enn godt. Eit lite ekstra-tips kan vere å drysse over litt heimelaga müsli på toppen. Når salaten får litt ulik tekstur og tyggemotstand, blir den enda meir spanande!

Bruk ein eller fleire sortar grøn salat. Skyll salaten, grovhakk og fordel utover eit fat. Finhakk litt raudlauk som du drysser over og legg på oppskårne appelsinbåtar og betar med chevre til slutt. Hell over litt olivenolje eller ein honningbasert dressing, før du avslutter med nykverna pepar på toppen. Meir treng ein ikkje!

/Inga

Lefserullar til kveldsmat

Denne veka er eg og mormor heime aleine på tunet. Eg jobbar litt på dagtid denne veka og ho lagar middag til eg kjem heim.  Om kvelden er det te og kveldsmat. For eit luksustilvære!

I går kom kusina mi og på kveldsmat. Ho hadde vore på Ekstremsportveko på Voss kor ho til og med hadde konkurrert i frikjøring! Me som ikkje er fullt så tøffe fekk full rapport frå ei kjekk veke. For  å bøte litt på blåmerkene ho hadde med seg i heim att, slo me til med lefserullar til kvelds.

Med få ingredienser og ein pakke lefser (eg brukar Vestlandslefser om eg ikkje har heimebaka) kan ein lage ein storslegen kveldsmat. Dette fungerer forøvrig som lunch også, -for ikkje å snakke om turmat!

Eg er veldig glad i søtt og salt saman. Etter ein runde i kjøleskapet til mormor, vart desse tre variantane prøvd ut i lefsene. Det var godt som berre det, uhyre enkelt og bra mat for sletne kroppar!

Lefserull med appelsinskinke, ruccola og plommechutney frå Hardanger

Eg er veldig glad i chutneyane frå Hardanger. Gode krydder saman med sylta frukt gir ein indisk vri på maten. Mormor hadde fleire sortar i kjøleskapet men eg gjekk for den med plomme. Saman med salt skinke og mykje salat var det rett og slett digg!

Lefserull med vellagra Jarlsberg, ramslaukpesto og ymse salat

Ramslauk er Noreg sitt svar på kvitlauk. I pestoversjon er den uhyre god (mormor hadde ein tysk versjon, men ein finn mange fine norske variantar på marknaden). Saman med vellagra ost og litt ymse salat (raudbetblad og feldsalat) vart det  ein høgdare.

Lefserull med gamalost, rømme og tyttebærsyltetøy

Gamalosten held på å få vind i segla. Det er ikkje dumt. Den er jo så god! Saman med litt frisk rømme, litt salat og noko søtt som til dømes tyttebærsyltetøy er det kort og godt kanongodt (men passar gjerne best for vaksne smakslaukar)!

Nyt med ein kopp te og i godt lag!

/Inga

Aspargessalat med sennepsdressing

Då eg var på D/S Louise for nokre veker sidan fekk me mellom anna smake grøn salat med asparges og sennepsdressing. Så enkelt, så ufatteleg godt! Eg måtte difor lage ein eigen versjon i helga. Ein kan verkeleg fråtse i grøn og kvit asparges om dagen, -og det gjer eg!

Ingredienser

• 1 bunt asparges
• 1 boks feldsalat
• 1-2 ts grov sennep
• 5 ss olivenolje
• 1 ts honning
• 1 fedd kvitlauk
• sitronsaft
• salt og pepar

Kok opp ein kjele med lettsalta vatn. Brekk av tuppane på aspargesen (hald dei litt i spenn i tuppane, så brekk dei der dei skal). Skrell kjapt av det ytterste skalet nedst på tuppane. Legg aspargesen i kokvatnet og la dei trekke i nokre minutt. Hell dei ut og over i eit dørslag. Hell over rikeleg med kaldt vatn så dei kjølner fort. Evt. ha dei over i ei bolle med isvatn.

Skyll feldsalaten og fordel utover eit fat. Legg aspargesen på toppen. Bland saman dei resterande ingrediensene. Smak til med sitronsaft, salt og pepar. Hell over salaten og et!

/Inga

Eit ertig mellommåltid

Grøne erter er frykteleg godt, sunt og har ein fantastisk fin farge. Eg er blitt veldig glad i å bruke dei i supper og salatar. Her er ein ny versjon; som pesto! Servert på erteflatbrød som eg fekk med meg heim på torsdag, vart det eit skikkeleg «ertete» mellommåltid i går.

Oppskrifta er litt lita. Det rekk til to personar (eller ein om du smører like tjukt på som meg). Dersom eg skal lage dette til fleire personar vil eg difor doble oppskrifta.

Oppskrifta er heller ikkje ein klassisk pesto, då den ikkje inneheld parmesan. Det kan ein eventuelt tilsette om ein ynskjer ein rundare smak.

Nyt saman med grillmat eller fisk, på bruschetta, på toppen av pizzaen eller kort og godt på eit flatbrød slik som her.

Ingredienser

• 1 dl frosne erter
• 2 ss valnøtter
• 1/2-1 fedd kvitlauk
• 2 ss olivenolje extra virgin
• 1/2 ss sitronsaft/limesaft
• Salt og pepar

Bland saman alle ingrediensene i ein blender. Køyr maskina til du har ynska konsistens. Ferdig!

/Inga

Somarsalat med vassmelon og koriander

I gårkveld var leiligheten plutseleg tom. Mannen var reist til Haag og mormor var reist til Stovner. Eg tok difor eit djupdykk i kjøleskapet for å lage litt singlekvelds. Der fann eg jommen nokre godsaker som vart første smaken på skikkeleg somar!

Kven skulle trudd at koriander og søt vassmelon kunne vere så godt i lag? Saman med litt asparges, bønner, og godt brød til, vart det eit mettande måltid. Medan eg  sat og gomla salat, kunne eg likevel ikkje la vere å fantasere om andre saker som kunne passe fint i salaten. Fetaost til dømes! Eller kanskje litt Haukeli Chèvre? Salt, kvit geitost smakar himmelsk saman med noko søtt.

Ein fin innbytar for melonen kunne vere søte jordbær. Eller bringebær! Eg gler meg til ein lang somarsesong med mange gode smakar. Men først: salat med vassmelon og koriander. 😀

Ingredienser for to personar (eller ein person som i tillegg får ein skikkeleg bra lunch dagenderpå)

• 1 hjartesalat
• 1/2 raudlauk
• 1 brett aspargestuppar
• 1 boksa hermetiserte kidneybønner
• 4 skiver vassmelon
• fersk koriander
• ferskpressa sitronsaft
• olivenolje
• salt og pepar

Kok opp vatn i ein liten kjele. La aspargestoppane trekke i nokre minutt før du heller dei ut i eit dørslag og skyljer dei godt med iskaldt vatn. Om du er skikkeleg proff, har du klar ei bolle med isvatn som du slenger dei oppi.

Del opp salat, lauk, vassmelon og fordel utover to fat saman med skylte kidneybøner. Grovhakk koriander og del aspargestoppane i to. Legg på toppen av salaten. Avslutt med å dryppe over  litt sitronsaft, god olivenolje og nykverna salt og pepar.

/Inga