Konsten att fika

Den som trudde at Ikea, Volvo og Zlatan var det ypparste Sverige kunne by på, har tatt grådig feil. Dei har nokre oppfinningar som er langt, langt betre enn  som så.

For det første: «fika» er eit ord eg saknar i det norske språket. Tenk så heldige svenskane er som har eit eige ord for å drikke te/kaffi og ete noko søtt attåt! Noreg må importere det ordet snarast, -og eg kan gjerne byrje.

Chockladbullar eller sjokoladeboller, er nok ei fin, svensk oppfinning. Å trylle fram saftige sjokoladeboller med få ingredienser du mest sannsynleg allereie har i skapet, er gull verdt. Då prosessen i tillegg er gjennomført på null-komma-null, er eg seld. Sjokoladeboller passar såleis perfekt til ei impulsiv fika på ein elles grå dag.

Svenske sjokoladeboller

• 100 g smør
• 1 dl melis
• 3 dl havregryn
• 2-3 ss kakao
• 1 ts vaniljesukker
• 2 ss sterk kaffi
• kokos eller kakepynt som ein kan rulle kulene i.

Smelt smøret og bland alle ingrediensene saman. Form kuler som du rullar i kokos eller kakepynt. Voila! Klappa og klart!

Server saman med ein kopp kaffi eller te. -Gjerne i godt lag.

Dronning Sonja ville også fika.

I dag smakte sjokoladebollene ekstra godt. Når regnet høljar ned, ein skal skunde seg heim gjennom byen og ein presterer å miste eit bilete i bakken så det knuser, rett etter at ein forlot rammemakaren, -ja då skal eg love deg at ein treng nettopp ei fika.

/Inga med ørlite tysdagsgruff

Quinoabetar med eple og sjokolade

Barseltid har ikkje vore gullperioden innan matlaging. Hadde det stått på meg, kunne me meir enn gjerne hatt brødskiver med makrell i tomat til middag kvar dag den første månaden (eg driv periodevis tungt (mis)bruk av makrell i tomat). Heldigvis kjem ein inn i ein viss tralt igjen etterkvart og eg har no byrja å lengte etter matlaginga att. Godt er jammen meg det.

Då er det fint at det er så mange inspirerande sjeler der ute. -Som Trine, som skriv Oliven&Sjokolade! Ho møtte eg under opninga av D/S Louise i juni. Ho er ei skikkeleg bra dame som skriv ein kjempefin blogg! Eg anbefalar på det sterkaste å ta turen innom.

Denne gongen var det quinoa-betane hennar som freista. Etter ein tur utandørs i iskaldt regn og sludd, freista det med noko søtt og varmande då eg kom inn igjen. Quinoa brukar eg gjerne til middagar, så dette kan vere ei fin resteoppskrift om ein har litt til overs ein dag.

Eg tilpassa oppskrifta eige kjøkenskap og måtte erstatte litt av havregryna (hadde berre pittelitt igjen) med mandelmjøl og lønnesirup med agavesirup. Istadenfor lakrispulver, tilsette eg 50 g grovhakka, mørk sjokolade. Lakris er forsåvidt ein god nr.2, så det må definitivt prøvast ut ein gong det også.

Då eg mangla muffinsformer i papir, klipte eg opp små kvadrat av bakepapir som eg hadde i formene. Eg hadde også litt meir røre i muffinsformene for å lage større betar.

Det smakte ganske enkelt himmelsk! Eplet gjorde betane litt friske, medan mandelmjølet gav ein liten smak av marsipan. I tillegg er dei fiberrike då dei inneheld mykje quinoa. Det er rett og slett eit nyttig mellommåltid og eg elska det.

Det kan vere verdt å merke seg at betane ikkje har same konsistens som muffins. Dei er langt meir porøse og er difor best å ete med skei. Saman med eit glas iskald mjølk og litt avislesing, vart det ein real søndagshøgdare.

/Inga

Einerbærgodteri

Under juletreet i år låg ein liten smakebete av Valdres. Treak vert kalla «fjellkaramellen» og eg hadde aldri høyrt om det før. Karamellen vert produsert av Ekta gødt frå Valdres og er laga av dei tre enkle ingrediensene einerbær, sukker og fløyte.

Den smaka heilt himmelsk og hadde i tillegg verdas finaste innpakking!

Slike smakfulle gåver diggar eg! Karamellstanga vart delt broderleg over ein kaffikopp og eten med andakt. Nydeleg!

/Inga

Lokkemat for b-menneske

Den vanlege Ingaen er eit ivrig a-menneske. Å stå opp klokka tidleg for å ha tid til lang frukost, kaffi og aviser er fast rutine. Rutinen har eg arva av far min og det er ein heilt nydeleg start på dagen.

Problemet er berre at den Ingaen fordufta for nokre månadar sidan. I staden har det flytta ein zombie inn i leiligheten. Ein zombie som slokner på sofaen etter middag og som tykkjer det å stå opp er litt som å hoppe stille lengde med ein sandsekk i kvar neve.

Heldigvis veit ein etter 27 år kva knappar ein skal trykke på. Ein er eit enkelt menneske skal du vete! Ihvertfall så lenge sjokolade er med i biletet.

Eg kom over oppskrifta på müslibarar hjå flinke Tine her i helga. Då eg nett hadde laga ein stor porsjon müsli var det fort gjort å lage litt lokkemat for sletne sokkar. Så enkelt. Så genialt. Sjokolade er genial smøring og no går det som smurt (ok. Der tok me hardt i. Det er ihvertfall litt lettare) å komme seg ut av senga.

Ingredienser

• 1 l müsli (til dømes denne)
• 1 kopp tørka bær/rosiner/kokos
• 200 g mørk sjokolade

Fordel müslien utover eit fat med kant. Dryss over eller bland inn bær, rosiner eller kokos om du ynskjer å smaksetje den meir. Smelt sjokoladen i vassbad og hell jamnt utover müslien. Sett i fryseboksen og la det stivne i 10-15 minutt.

Ta ut av fryseboksen og løsne frå forma. Del opp med kniv eller brekk laus betar som du oppbevarer i kjøleskapet.

Nyt med ein kopp te eller eit glas mjølk. Eg lovar. Desse får deg opp av senga om morgonen!

/Inga

Somarkaka

Somaren er på hell, og eg er tilbake på Austlandet. No ventar eit bryllaup til helga og syttiårsdag helga etter, -SÅ er me klare for å ta fatt på den verkelege kvardagen igjen!

Det er noko med det å få tid til å berre pusle i heimen litt i somarferien også. Nokre maleprosjekt og ryddeprosjekt er allereie i gong. Det vart mykje me måtte utsetje grunna ein hektisk vår på jobb og studier. Med nok kaffi/te, oppbretta ermer og litt sjokolade håpar eg på å få unnagjort mange av punkta på lista, -og eg må sei er gler meg! Det er ingenting som er så fint som å få litt orden i sysakene og starte hausten med nokonlunde blanke ark!

I mellomtida legg eg ut denne kakeoppskrifta som eg må lage minst ein gong kvar somar. Den er frisk, himmelsk god og smakar skikkeleg av somar. I tillegg kombinerer den noko av det beste eg veit, nemleg smaken av sjokolade, frukt og bær!

Denne kaka inneheld både cottage cheese og havregryn. Slik sett er den også litt matnyttig. Kremt. Om ein vil, kan ein gjere somarkaka sukkerfri ved å velje sukkerfri gelé og youghurt. Eg brukte vanleg jordbærgelé men Yoplait sin bringebær- og jordbæryoughurt utan sukker. Det er lurt å bruke same smakane i gelé og youghurt.

Ingredienser

• 100 g mørk sjokolade (gjerne med 70% kakaoinnhald!)
• 5 dl havregryn
• 1 pk gelé
• 500 g youghurt (1 stor boks eller 4 små)
• 1 boks cottage cheese

Smelt sjokoladen i vassbad. Rist havregryna i ei tørr panne. Bland saman havregryn og sjokolade. Trykk ned i kakeforma slik at du har ein jamn botn. Sett i kjøleskapet til kjøling slik at botn hardnar.

Kok opp pakken med gelé med halvparten av vatnet som er angitt på pakken. Medan det står til kjøling moser du youghurt og cottage cheese med stavmiksar. Dette for å finmale cottage cheesen. Bland det godt saman. Hell i den avkjølte geléen (behøver ikkje vere kald) medan du blandar godt. Hell blandinga over sjokoladebotn og sett kakeforma på eit fat i kjøleskapet. Då unngår du søl om den ikkje er heilt tett. La kaka kjølne i kjøleskapet i 2-3 timar til den er stivna.

Pynt med bær eller blomar, -så er den somarleg og fin!

   

  

Kort og godt, -ei somarkake som er lettvint å lage og som ein blir rett og slett glad av å ete!

/Inga